ابڙو اڪيڊمي Abro Academy
2020-07-18
داخلا نمبر 517
عنوان سيسي سنگرس
شاخ پکي
پڙهيو ويو 414
داخلا جو حوالو:
سيسي سنگرس
ھي پٽ تتر جو قسم آھي. 25 سينٽي ميٽر جسامت جي پٿريلي رنگت واري ھن ٽاڪرو پَٽ تتر کي سڄي بت تي ڪاري رنگ جون ويجهيون ويجهيون ليڪون هونديون آهن. نر ۽ ماد جي رنگن ۾ڪجهه فرق آهي. ان جو رنگ ڳاڙهسرو هيڊو يا هلڪو سروٽي آهي. پُڇ ڊگهو ۽ نوڪدار اٿس. پيٽ جو وچون حصو ڪارو، ڳچيءَ ۽ اکين تي سرمائي پٽا، پَرن جا پويان حصا ڌاريدار ٿين ٿا. ماديءَ کي پٺن تي، ڇاتيءَ تي ۽ مٿي چوٽيءَ تي ڪارا چِٽ چِٽ ٿين ٿا.
نر کي مٿي ۽ ڇاتيءَ تي ميٽوڙي هيڊين ۽ ڪارين پٽين جون آرائشي ليڪون ٿين ٿيون، باقي پيٽ تتر کرڙي اٿس. ماديءَ کي مٿي ۽ پِيٽ تي ليڪون ڪونه ٿين . هي پکي سنڌ بلوچستان کان سواءِ يمن ۽ اتر آفريڪا ۾ به ٿئي ٿو، جيڪي نيم صحرائي علائقا آهن. خود هن پکيءَ کي پٿريلا علائقا پسند آهن، جتي ٻوڙن کي پناهه گاهه ٺاهي ٿو. اڪثر ٻجن، ٻٻر ۽ ٻين ٻوڙن تي پلجي ٿو. ڏينهن جي گرم وقت ۾ ٻوڙن ۾ لڪي آرام ڪندو آھي. اڃ اجهائڻ لاءِ روز صبح جو سوير يا سج لهڻ کان پوءِ پاڻي تي اچي ٿو. ان جو آکيرو اڪثر حالتن ۾ پاڻيءَ جي ذخيري کان 30 ڪلوميٽر پري هوندو. ٻچن لاءِ پاڻي آڻڻ جي ذميواري نر تي آهي جيڪو هو پنهنجي پيٽ جي کنڀن کي پاڻيءَ ۾ ٻوڙي ڀري کڻي ايندو آهي. ان جو آکيرو اگهاڙي فرش تي هلڪو کڏو هوندو آهي جنهن ۾ ڪنھن به شئ جو ڀراءَ ڪونه هوندو آهي. ھي ماحول: 3 جو پکي آھي.